Prima de 2025. Lo temps de las sortidas, de las classas verdas, lo temps del novelum, del borronament dels arbres, de la creissença de las plantas. Lo temps de l’espèr, de l’optimisme.
Lo temps tanben per la còla Aprene 1 d’agachar dins lo retrovisor e de constatar lo camin entreprés fins ara. Sèm coma la prima, prèstas a embraçar una partença novèla après aquela annada rica. Prèstas a s’escampar dins una classa, a far de la transmission dels sabers nòstre “mantrà”. Aquela enveja de partatge e de transmission transpira dins aquel jornal. I trobaretz de subjèctes divèrses, de ponches de vistas variats, de recèrcas menadas……fin finala, un pauc de nosautras e de nòstras diferéncias.
Aquela diferéncia de cultura sustot, tan cara a Calandreta, ensajam aicí de la valorizar a nòstre nivèl pichon.
Per tot aquò, vos desiram una bona lectura e coma l’aucèl que fa « qui quiriqui ! » a la prima, celebram la fin de quicòm e la debuta d’un autre.
Tomàs GUIRAUD e la còla
Laisser un commentaire