Per frenar la fonduda de las glaças, lo govèrnament fa installar 3000 climatizadors sus la banquisa
Tre l’estiu venent, son mai de 3 000 climatizadors que van èsser largats sus la banquisa per un immens pont aerian. « L’objectiu es de refregir durablament la banquisa per evitar que fonda pas mai, quitament que se reconstituisca en partida o totalitat » a explicat un pòrtaparaula del govèrnament. « Amb aqueste largatge de 1 climatizador cada 100 km², lo desreglament climatic serà d’istòria anciana » a ajustat, afirmant que s’agissiá aquí de la sola solucion realizabla d’un ponch de vista economic mas sustot ecologic.
Lo govèrnament a mentretant rampelat que d’autras opcions demoravan sus la taula. « Avèm mobilizat nòstres gabinets de conselh melhors sul subjècte, la banquisa serà salvada, avètz pas mai res a crénher ». Lo govèrnament a anonciat tanben soscar a doblar o triplar lo nombre de climatizadors, bastir un plan gròs refregidor dins lo quin se plaçariá la banquisa l’estiu quand fa tròp calor o installar de piramidas de pans de glaç. « La darrièra opcion serà de far de grandas collèctas de glaç quand los franceses desgibran lor refregidor puèi de la regetar sus la banquisa ».
Lo govèrnament a criticat los detractors d’aquel projècte que guinha un gaspilhatge energetic e una pollucion massisa. « Un còp mai, aquelas gents son dins una postura politica, sèm los sols a prepausar de solucions logicas e simplas a metre en plaça » a martelat lo pòrtaparaula del govèrnament.
Tomàs GUIRAUD e la còla
Laisser un commentaire