O vos disi sulcòp, ai degut mentir a mon paire per poder aver aquela recèpta :
– « Es pas per redigir un article d’un jornal legit per de milièrs de personas ? »
– « Non non Papà, promés. »
Òc, perque lo secrèt de la preparacion es gelosament gardat per cada familha que se gargalheja d’aver LA vertadièra recèpta.
Plat tipic de l’Erau en cò de las familhas pauras, lo ragost d’escobilhas èra elaborat lo dimenge a partir de totas las rèstas de noiridura de la setmana.
Liuri aicí una de las recèptas al prètz d’una batalha acarnassida (per vos metre dins l’ambient, escotar « lo pudding a l’arsenic » d’Asterix e Obelix a l’encòp) :
Preparacion : 30 minutas – Coseson : 2h30 – Per 8 a 10 personas
- 4 alas e 4 pilons de pol (« un pauc de vedèl mon pecat polidet »)
- 800 g de paleta de pòrc (« totjorn amb l’òs, malurós ! »)
- 2 punhadas de gresièrs e de fetges de polalha (« o autras tombadas, o sens pels cèls de boca sensibles »)
« Metèm pas de buòu ? – De buòu ? Es pas un bolhit, de qu’ai mancat dins ton educacion….»
- 2 gròssas cebas (istòrias pebradas ausidas mas censuradas)
- 500 g de carròtas
- 1 flòc d’api branca
- 500 g de patanas
- 2 culhierats bèls de concentrat de tomata
- 1 gròssa punhada de ceps secats
- 1 punhada d’olivas negras e 1 punhada d’olivas verdas del país
- Òli d’oliva
- Sal, pebre, ferigola
- Espelucar e copar totes los legums. Far trempar los campairòls secs dins d’aiga tebesa. Precòser los apis a l’aiga bolhenta salada qualques minutas e metre de costat (amb l’aiga).
- Dins una coquèla granda de fonta, far rossir los tròces de pol dins un pauc d’òli d’oliva. Far ara rossir la paleta de pòrc sus totas las fàcias. Padenejar las tombadas de polalha. « La coquèla arrapa al fons, es bon signe. »
- Ajustar un pauc d’òli e far rossir las cebas e las carròtas. Daissar rossir aital un desenat de minutas. Ajustar las patanas, far saurejar encara un pauc, puèi ajustar la carn, los apis amb lor aiga de coseson, los campairòls esgotats, las olivas esbolhentadas e lo concentrat de tomata. Lo liquid deu cobrir a nautor. Se besonh, ajustar d’aiga. Daissar mitonar pendent mai o mens 2 oradas.
- « La primièra forqueta crèma totjorn la lenga »
Per acabar, lo secreton de la recèpta familiala : Vos cal còser la …..Nifla, me desencusi…………Vòli pas èsser deseretat, me devi arrestar aquí.
NB : Podètz retrobar las familhas que s’afrontan pendent lo grand campionat del mond de ragost d’escobilhas previst a Pesenàs lo dimenge 2 de març de 2025.
Qué que ne siá, mon paire i serà per criticar las recèptas dels participants.
Tomàs Guiraud e la còla
Laisser un commentaire