Recèpta(s)

Carnaval obliga, aquiu recèptas de sason : crespèths e aurelhetas. Pas las de qui que sia, las de la mairbona. Que hèn partida d’aqueras recèptas qui’ns balhan aqueras capas cosinèras qui’s desconeishen en díser «veiràs, n’ei pas complicat, jo que hèi a vista de nas» e que s’i mauescadem a cada còp… Bona escadença doncas…

Crespèths

Ingredients (tà ua cèrta quantitat de crespèths, « E tè ! Depend se’us vòs gròs o pas ! … ») :

– 100g de burre
– 4 ueus
– 150g de haria
– 25 cL d’aiga
– 10g de sucre
– ua sara de sau
– perhum a la causida

• Dens ua caishòla, mesclar l’aiga, la sau, lo burre, lo sucre e lo perhum ( « a puish près atau, que ! » ).
• Har borir e, shens deishar lo borit, juntar la haria passada d’un sol còp.
• Mesclar a tira bordon suu bòrd de la cosinèra dinc a çò que la pasta e’s destaque deu hons.
• Deishar en·hredir un drin («aquiu, veiràs plan»), puish juntar los ueus un per un en préner suenh deus bàter en moleta abans deus incorporar.
• Har cauhar òli a 170/180°C e juntar la pasta chic a chic.
• Quan lo crespèth ei plan daurat (que’u podetz har virar), tirà’u de l’òli e pausà’u sus un papèr bevedís puish sucrar de pertot.

Aurelhetas

Ingredients (tà ua bona quantitat) :

– 500g de haria
– 40g burre honut
– 25g de sucre
– 25g de borider trempat dens aiga tèba
– 4 ueus
– 4 culheradas de lèit
– 4 culheradas d’aiga
– 4 culheradas de ròm
– 1 culherada de pèth de citron arraspada
– 7g de sau fina

• Mesclar los ingredients dens ua terrissa e tribalhar quauquas minutas.
• Cobrir e deishar fermentar sheis òras au caut ( « a costat deu radiator per exemple » ).
• Tà còser, har cauhar òli.
• Pendent que cauha, aplatir la pasta («quasi com papèr») e copar rectangles pro grans.
• Préner un rectangle e esperlongà’u enqüera un drin abans deu trempar dens l’òli.
• Quan ei plan daurat (que’u podetz tanben har virar), tirà’u de l’òli e pausà’u sus un papèr bevedís puish sucrar de pertot.

Bona hami se’v i escadetz !

P.S. : fotografia non contractuau

Matiàs Buzy e la còla