Lo ministèri de la Cultura qu’a validat ger ser un projècte un drin hòu. Après la creacion deu Lovre de Lens e deu centre Pompidó a Metz, que persegueish la soa volontat de miar la cultura aus francés tà que non demore pas embarrada a París.
Atau, en acòrd dab lo capdulh de França, la tor Eiffel qu’arriba a Tolosa ! En efèit, la comuna parisenca que vien de votar la refeccion deu camp de Mars tà ua mesa en conformitat dab las navèras règlas gessidas deu XVIIau Granèla de l’Environament, qui enterina notadament un còp per tostemps la limitacion de l’utilizacion deus neonicotinoïdes a 1L per dia e per mètre carrat quitament se ua part deus agricultors arroganha. Lo representant de la Federacion Nacionau deus Agricultors Pas Contents Per’mor Que Vòlen Tribalhar Tranquilles (FNAPCPQVTT) qu’ac a brembat : «N’èm pas contents, que volerem poder tribalhar tranquilles !» (sic). Mes tornem au subjècte. Per’mor de l’amplor d’aquestes tribalhs, la tor ne pòt pas demorar en plaça. L’idèa qu’èra alavetz d’enviar lo monument hens ua auta vila quauques temps tà’n har profieitar los provinciaus. Qu’ei la vila de Tolosa qui estó retenguda au miei d’un detzenat de candidatas. Lo projècte tolosan que hasó l’unanimitat au demiei de la jurada per’mor de mantun punt d’excelléncia. La localizacion de la tor sus la plaça Sent-Pèir, au ras de Garona que li permeteré de non pas estar tròp despaïsada puishque demora adara au ras de Sèna. La preséncia de bars de rugbi pas tròp luenh qu’ajudaré tanben, d’après lo dossièr de candidatura, a miar a la cultura ua partida de la populacion qui n’a pas accès de costuma ad aquera escadença. Mes l’argument estarrocaire qu’estó l’utilizacion de la tor au marge de las celebracions tolosencas. Qu’auré segurament mei lo parat de vestí’s de negre e roi tà hestejar las victòrias de l’Estadi Tolosenc que de blu, blanc e roi tà hestejar las victòrias europencas deu PSG !
Las òbras granas tà arcuélher la tor Eiffel que van doncas començar rapidament a Tolosa, çò qui balharà un apercebut pro realiste de la vita parisenca. Contactats per la nosta redaccion, los e las tolosenc.a.s n’an pas desirat respóner ad aquera informacion, probablament tròp esmavuts.
Matiàs Buzy e la còla
Laisser un commentaire