Punt meteo :
Aprèp los auratges e los tremols del mes de mai – examèns de MASTER, portfòlio, DCL – lo solelh trauca las nívols. Las espatlas de mai en mai leugièiras, acabam l’abans darrièr seminari. Bufa que bufaràs, lo vent nos mena totjorn mai luènh sul nòstre camin de formacion, e de segur, parlam pas sonque de geografia…Las colors de l’arcolan rajan coma las nòstras emocions : solatjament, estrès, espèra, tristessa, lassièira, fiertat e jòia. Jòia d’èstre ensemble perçò que ongan, la nòstra fòrça es la còla.
Los aucelons aprofeitan un bocin mai de la becada a APRENE, abans de faire lo grand saut fòra del nis. Nos demòran qualques estagis en afortiment e responsabilitat per anar pescar encara daus elements essencials, puèi nos escampar soletas dins l’aventura Calandreta. Enfin, soletas ? Non pas ! Dintram dins un moviment collectiu, que s’enriquís mercé al partatge e a la cooperacion. Partam d’aquel seminari tanben amb la consciéncia que lo nòstre engatjament va plan mai luènh que las frontièras d’Occitania, mercé al rencontre amb los membres de l’Observatório de Territórios Sustentáveis e Saudáveis da Bocaina de Brasil acompanhats per Pèire-Joan Laffitte.
Bona lectura d’aquestes novèls articles e que lo nòstre cant ‘Quí QuiriQuí ressone d’Occitania cap a Bretanha.
Cristina Cazaubon, Delfina Bruel, Fleurina Sanouillet e la còla
Laisser un commentaire