Aprene1 – 10 vidas en un an

Engatjatz-vos que disián……veiretz de país que disián……

Sèm al calabrun d’aquela rica annada d’Aprene 1 e ai bon espèr que nos rapòrte un vintenat d’annuitats per la retirada. Luènh de ieu l’idèa de jogar lo Calimerò de servici per de que aqueles qualques meses an revelat un potencial d’organizacion e d’adaptacion insospechat fins ara. Ai pas mai 14 ans mas plan 34 !

Lo batèl A1 voguèt sus diferentas mars : de la formacion Aprene, en passant per la descobèrta de quatre escòlas, las preparacions e responsabilitats de classa, la capitada del mastèr, la sortida dels jornals de la còla, rampelar a nòstres pròches que i a plan qualqu’un qu’ocupa aquel còs la dimenjada. Pasmens, la bossòla interiora a pas cambiat de cap : VOLÈM VENIR REGENTAS !

Es vertat, vos devi far una confession…avèm pas sonhat nòstra marca carbòni : Besièrs, luòc del mastèr, luòc d’estagi, amassada del mastèr (evidentament diferent del luòc inicial), retorn a Besièrs, Pau, Tolosa, Masamet, Pesenàs… Aquò val benlèu pas un anar-tornar dins l’espaci a bòrd d’una naveta privada de torisme mas enfin….

Per dessús-tot, avèm crosat la rota de tant de personas incrediblas, inspirantas, qu’an partejat lor passion amb enveja e amor. Es aquí dificil de citar las figuras qu’acompanhèron nòstre trajècte mas lor apòrt serà definitivament considerable dins nòstra construccion coma regentas : contaires, autoras, benevòlas, regentas, associatius, cantairas, actors del mond occitan…. vos disèm mercé.

Per acabar, aquela annada es abans tot una aventura umana collectiva. Coma se quicòm d’impalpable nos ligava a jamai. Es “umana” perque aquò tòca a las emocions, a l’engatjament, a las relacions. Es “collectiva” perque la riquesa ven de la diversitat de las personas implicadas e de çò que crèan amassa.

Amassa justament, traversam de desfises, partejam de moments fòrts, nos sostenèm, evoluïssèm… e acabam transformadas, individualament e collectivament. Mercé a l’univèrs d’aver permés aquel rencontre, m’acompanhatz pertot ont vau.

Caras amigas d’Aprene 1……………..Quí QuiriQuí un jorn, Quí QuiriQuí totjorn !

Tomàs GUIRAUD e la còla