Los 13 dessèrts

Los 13 dessèrts son un bon mejan d’acabar lo repais de Nadal (sovent plan copiós !) sus una nòta sucrada. Simbòl de la generositat mediterranèa, es important per lo monde de partejar en familha o entre amics de doçors lo ser de Nadal. D’ origina provençala, la tradicion dels 13 dessèrts se difusa tanben cap a las regions vesinas coma Lengadòc.

Aquela tradicion es evocada pel primièr còp en 1683 dins lo libre d’un prèire. Parla de la preséncia d’amètlas e autras fruchas secas sus la taula de Nadal. Al fil de las annadas d’autres autors mencionaràn aquela tradicion sens parlar del nombre 13.

Al sègle XIX, Frederic Mistral se va clinar sus aquela tradicion quasi desapareguda e li balhar una segonda vida. Mas es pas qu’en 1920 que lo nombre 13 es adoptat. Aquò fa referéncia a Jèsus e als 12 apòstols que l’acompanhan pendent la cena. Aquela meteissa annada la lista dels dessèrts es egalament publicada.

Dempuèi, la lista a evoluat, en i ajustant de produches que se tròban a l’ora d’ara, mas tanben en foncion dels gostes de las familhas. Es donc pas estonant de veire de chocolat sus las taulas de Nadal !

Per capitar vòstres 13 dessèrts de Nadal i deu aver :
– 5 fruchas secas a la causida : albricòts, rasims, noses, dàtils, avelanas…
– 4 fruchas frescas a la causida : iranges, pomas, peras, clementinas…
– 3 confisariás a la causida: chocolat, nogat, pastas de fruchas…
– 1 pompa a l’òli

Pastissariá immancabla dels 13 dessèrts, la pompa a l’òli tira son nom de la farina mesa dins los molins d’òli per pompar las rèstas d’òli.
Podètz trobar aquel dessèrt dins d’unas fornariás, mas o podètz sustot far en çò vòstre e mai s’avètz pas de molin d’òli !

Ingredients:

• 500 g farina
• 25 g levadura de fornièr
• 25 cl aiga de flor d’irangièr
• 25 cl òli d’olivas
• 125 g sucre fin

Opcional
• qualques zèstes d’agrums
• 1 c a cafè anís en gran

– Mesclar tot los ingredients dins un saladièr, fins que la pasta se destaque del plat.
– Daissar la pasta conflar 3 oras.
– Espandir la pasta sus una placa de coseson e daissar pausar 1 ora de mai.
– Còser dins un forn a calor viradissa a 180° pendent 12 minutas.

La podètz manjar lo jorn meteis o esperar qualques jorns que se seque e venga mens grassa.

Lisa KIENEMANN e la còla