A – ATSEM : L’arma de la mairala. Coneis lo pichon nom de cada mainatge, son grop sanguin, sa puntura, quant a de dents a una près, lo foncionament de la fotocopiadoira, e ton umor del jorn res qu’a ton cap e vice-versa. Respècte etèrn.
B – Benvolença : Mot-clau de la formacion. Aplicat als mainatges, als collègas… e, o esperam, a se quitament quand nos sèm mancats sus la nòstra sesilha d’arts visualas.
D – Dimenjada : Teoricament facha per se pausar. En realitat : preparar, corregir, tornar legir, estressar… e de còps, miracle, dormir.
F – Ficha menaira : Document pedagogic suspausat estructurar ta sesilha… e qu’acaba sovent per venir un roman de 3 paginas. I passas doas oras per una activitat de vint minutas. E pasmens, sens ela, te sentes nud coma davant lo tablèu sens greda. Ta cachavièlha pièja, ton aliat melhor, ta carga, ta bossòla.
J – Jòcs cooperatius : Activitat geniala sul papièr, leugièrament caotica dins una classa de 24 CE1 a 16h.
K – Kleenex : L’arma favorita del regent, totjorn dins la pòcha : pels nases que rajan, las lagremas imprevistas (escolanas o estagiària), las allergias de prima, e los accidents de totes tipes.
M – Mainatges : Pichons èssers imprevisibles, de còps brusents, sovent atrasents, e totjorn susprenents. Son eles que rendon lo mestièr viu.
O – Oraris de classa : 9h-17h ? Òc, mas en fach non. Per de que tu, ès aquí a 7h50 amb ton cafè, e tòrnas partir a 18h amb una pila de quasèrns.
Q – Quasèrn-jornal : Aquel misteriós document que pòt prene 5 minutas o 3 oras a redigir, segon ton nivèl de motivacion (e l’imminéncia d’una visita).
R – Recreacion : Pausa sacrada… pels escolans. Per tu, es susvelhança dels trajèctes en tricicle, gestion de disputas a basa de « Marius m’a dich que soi un cacà poirit ! », o preparar mentalament lo rendètz-vos amb lo papà de Lina que s’anóncia “rock’n roll”.
U – Urgéncia : Estat permanent de ton cervèl aprèp cada conselh regents.
V – Visita : Aquel jorn ont susas las sèt pèls dins ta camisa repassada, recitas mentalament los programas, e sorises fòrça tròp fòrt.
X – Xilografia : Mot complicat qu’as descobèrt en preparant una sesilha d’arts visualas e qu’impressiona dins un dorsièr.
Y – Yòga : Activitat que sómias d’introduire en classa… o que practicas ja quand lo còdi es roge e qu’es lo rambalh.
Z – Zèro : Coma lo temps de pausa qu’avèm per far pisson.
Tomàs Guiraud e la còla
Laisser un commentaire