L’estiu qu’a dejà hèra plan començat dab la hèsta de la musica.
Tà non pas desbrombar la còla Sèrgi Mauhòurat e la cultura occitana pendent la sason aquesta, que’vs perpausam ua seria de hestenaus a noste.
Festenal de l’Universitat Occitana de La Guépia 82
del 08 al 13 de julh
Coma cada an, La Guépia e l’associacion Lenga Viva propausa son Universitat occitana, temps fòrt de julh, amb corses de lenga, talhièrs de musica (tamborin, acordeon), de danças (occitanas, e dels paises dels Balcans), de capoeira, de fabricacion de mascas, de cosina, e plan solide de concèrts. Lo programa es disponible sus lengaviva.com
Festenal del Ròc Castèl : convidatge al viatge lent
Cailar – 34 – del 24 al 27 de julh
A la fin del mès de julh, del 24 al 27, sul Larzac al Cailar, se debanarà lo festenal del Ròc Castèl.
Lo festenal tira son nom de la colina dolomitica que susplomba lo vilatge.
Aquel Ròc Castèl foguèt identificat pels passejaires del Larzac, al fial del temps.
Vertadièr espaci de rencontres, de descubèrtas e d’escambis, lo festenal prepausa un agach e un viscut diferent del viatge. Aquí, lo monde que fan la causida de viatjar d’un biais tranquille, venon partejar lors experiéncias. Lo festenal se plaça jol signe del viatge lent. Prene lo temps de caminar, la tòca es pas tant la destinacion que la caminada. A pè, a esquina de caval, d’ase, a bicicleta… tot fa camin.
Acte quitament revolucionari dins la societat nòstra del lèu, totjorn tròp lèu. Escasença bèla de prene lo poder sul nòstre temps e suls nòstres espacis. Los rencontres son organizats cada jorn amb los passejaires, per que pòscan presentar lors projèctes viscuts.
Aventurièrs dels desfises grands o agrimensors dels caminòts, diferents viatjaires seràn aquí per escambiar amb lo monde e perqué pas, per balhar enveja de s’escampar dins aquela descreissença necita.
Pasmens, lo festenal propausa de concèrts, de talhièrs menats per d’artisans, un salon de lectura… de qué se far plaser, lo temps de lo prene.
Totes los talhièrs, rencontres, concèrts e animacions son sus participacion liura. De boitas de don seràn dispausadas per poder sosténer l’eveniment.
Lo festenal del Ròc Castèl, inspirant e portaire d’un vent novèl !
Trantalhetz pas ! La noiridura pel còs e per l’esperit seràn al rendètz-vos !
Festenal Les basaltiques
Puèi de Velai – 43
del 30 de julh cap al 2 d’agost
«Les basaltiques», un festenal en tèrra Velava. Delh 30 de julh elh 2 d’agost 2025, lo CDMDT43 vos espèra elh Puèi de Velai per l’edicion 20.
Las musicas e las danças tradicionalas d’Auvèrnhe e d’endacòm mai seràn a l’onor amb d’artistas que valorizan la cultura occitana dins una dimension actuala.
Vaquí en ligam lo program amb concèrts, balètis e proposicions d’estagis en dança, chant…
Hestiv’Òc
Pau – 64
del 21 fins al 24 d’aost
Per acabar las vacanças com de cau Hestiv’Òc que hesteja la soa vintau edicion. Aqueste hestau que celebra la cultura occitana, dab artistas qui vienen d’Occitania tota. Aus vòstes agendas, lo hestau que torna los 21, 22, 23 e 24 de aost a Pau. Que son concèrts, animacions culturaus per la familha tota, deambulacions.
Ça-vietz acabar de plan las vacanças a Pau.
Naïg Bondon, Cristina Cazaubon, Fleurina Sanouillet, Paulina Sialelli e la còla
Laisser un commentaire