De nombrosas legendas circulan dempuèi la nuèch dels tempses dins lo mond. Occitania es tèrra de nombrosas d’aquelas istòrias conegudas en França mas tanben dins lo mond entièr.
Dins aquel article anam descobrir una legenda de las mai celèbras : la de Rènnas del Castèl. Vilatjòt d’una centena d’abitants, entre Limós e Bugarag, ont a la fin del sègle XIX, l’abat Saunièra a marcat l’istòria del vilatge mas tanben endefòra.
En 1852, Berenguièr Saunièra es nommat curat dins lo vilatge de Rènnas del Castèl. Tròba alara una pichona glèisa en roïna e comença de far d’òbras per la restaurar. Aquestas son plan longas e plan lentas essent sol a la tasca e dispausant de pauc de mejan.
Mas al cap de 15 ans, las òbras s’accelèran, Saunièra bastís en mai de la glèisa un luxuós ostal e una torreta dins lo vilatge. Tot lo vilatge se questiona alara sus una misteriosa dintrada d’argent de la part del curat, aqueste essent pagat 100 francs (per una annada) auriá despensat 2,5 milions d’euros actuals per las diferentas construccions.
La legenda conta que l’abat Saunièra auriá trobat en realizant las òbras un tresaur compausat de pèças d’aur, de jòias mas tanben de papirus revelant de nombroses secrèts mistics coma una possibla descendéncia de J-C o la descobèrta del Sant Grasal. Segon sa familha, la glèisa voliá gardar la descobèrta d’aqueste tresaur secrèta.
Per d’unes, Saunièra seriá al cap d’un important trafic de messa per tal de recuperar de nombroses francs per tornar bastir la glèisa.
En 1917, Saunièra se morís, sa governanta ereta de sa fortuna e de sos secrèts, mas aquesta defunta d’annadas mai tard, après una vida de grand luxe, en emportant ela tanben la responsa a aqueles mistèris.
Pendent la restauracion de la glèisa, de nombroses detalhs son aponduts e entretenon lo mistèri : una estatua representant lo drac pòrta l’aiga-senhadièr, l’inscripcion « Terribilis es locus iste » (aquel endrech es terrible) es plaçada a la dintrada de la glèisa, los veirials son eles tanben enigmatics…
Dempuèi, de nombrosas personas localas o toristas venon a la descobèrta del vilatge per tal de trobar de responsas a aqueles diferents mistèris. D’unes espèran quitament èsser menats cap a un autre tresaur.
Lo romancièr american Dan Brown s’es jamai amagat de s’èsser inspirat de la famosa legenda audenca per escriure un de sos mai celèbres roman : lo Da Vinci Code. Dins lo roman, lo conservador del Louvre s’apèla Jacques Saunièra e a sa mòrt lèga a sa neboda de papirus comportant de messatges secrèts.
S’un jorn avètz la possibilitat de vos passejar dins lo polit vilatge de Rènnas del Castèl, oblidetz pas de visitar la glèisa e de partir a la caça al tresaur !
Lisa KIENEMANN e la còla
Laisser un commentaire