{"id":267,"date":"2024-12-20T13:25:39","date_gmt":"2024-12-20T12:25:39","guid":{"rendered":"https:\/\/qui-quiriqui.aprene.org\/?p=267"},"modified":"2025-07-22T03:50:39","modified_gmt":"2025-07-22T01:50:39","slug":"camoloc","status":"publish","type":"post","link":"https:\/\/qui-quiriqui.aprene.org\/?p=267","title":{"rendered":"Camol\u2019\u00f2c ?"},"content":{"rendered":"\n

Lo Lemosin, novela lenga oficiala d\u2019Occitania<\/strong><\/p>\n\n\n\n

Un brave debat remueda actualament la comunitat occitana. Lo Lemosin, lenga despreciada, lenga minorit\u00e0ria de las lengas minorit\u00e0rias, es a venir lenga de refer\u00e9ncia e de norma occitana. Decenias e centenaris de lucha per un p\u00f2ble e sa lenga, que sus la tauvera, a re\u00fcssit de far auvir sa votz. Lenga suava e sensuala, lo lemosin faguet tan sas pr\u00f2bas, que, en novembre darrier, lo Conselh Oficiau per la Lenga (COL), lo promouguet lenga normativa.<\/p>\n\n\n\n

Coma l\u2019argent es totjorn lo nerv de la guerra, fau tot ben ne\u2019n evocar las rasons, coma plan sovent, economicas, d\u2019aquela virada. A los que vesi\u00e1n, darrier la simplificacion a l\u2019exc\u00e8s au fiau de las edicions daus \u00abclub daus cinc\u00bb, un fenomene d\u2019aculturacion de la novela generacion, a los que comptan los mots, s\u2019indignan de la baissa drastica dau vocabulari daus libres de j\u00f2unessa, fau plan los avisar de l\u2019evid\u00e9ncia. Imprimar daus libres, qu\u00f2 costa char. Mas tranquillisatz vos, perque lo governament a trobat la solucion. Lo lemosin, emb sa chausida de far desapar\u00e9isser vocalas e sillabas entieras d\u2019un sole c\u00f2p d\u2019aferesa, sembla la solucion tota esperada a quela crisa economica de l\u2019edicion. Emb lo lemosin, qu\u00f2 es l\u2019asseguran\u00e7a d\u2019una lenga, richa de lexic, de vocabulari e d\u2019idiomatismes, mas sens tr\u00f2p aver de que pa\u00efar de caracteres bo\u00eete de nuit gonflable<\/a>.<\/p>\n\n\n\n

De mai, los scientifics an constatat que sem surtits dau paleolitic e qu\u2019avem chabat d\u2019\u00e8sser d\u2019\u00d2mes de Cr\u00f2s-Mamanhon. Avem chabat de nhacar lo mamot a plenas dents per ne\u2019n tirar la charn. Fali\u00e1 ben adaptar n\u00f2stre biais de nos servir de n\u00f2stras mandibulas. Una articulacion excessiva es, segon las recerchas (39,5 scientifics de tots pa\u00efs, lo darrier essent pas tr\u00f2p segur), la causa de 89.9999999% daus maus de testa e de las migranas chas los pre-adolescents, p\u00f2st-adolescents, pre-adultes e p\u00f2st-adultes. Aqu\u00ed tanben, lo lemosin es la solucion tota trobada a queu grand mau de societat !<\/p>\n\n\n\n

Lo chant de la version lemosina de la Marselhesa fai aura partida integrala daus espers de fin de cicle 2 dins totas las esc\u00f2las biling\u00fcas e immersivas (en mai de la localizacion de Leire-Naut, per solidaritat coma n\u00f2stres vesins dau parlat Velau…). E l\u2019estat franc\u00e9s pensa d\u2019espandre quela reforma a l\u2019ensemble dau territ\u00f2ri franc\u00e9s. Entremieg daus arguments soslevats per los especialistas, la beutat de la lenga, que, de sa do\u00e7or e po\u00ebsia naturala, far\u00e1 benleu passar a tota quela novela generacion la cruautat de mots que lor faudr\u00e1 plan aprener un jorn.<\/p>\n\n\n\n

D\u2019instabilitat governamentala a d’estabilitat ministeriala, l\u2019estat franc\u00e9s a actualament re\u00fcnit una equipa de cerchaires, trabalhant sus lo ben fondat de la generalizacion d\u2019aquela lenga coma \u00abraibe nacionau\u00bb. Perque, au pa\u00efs de la lenga unica, sabem plan que fau subretot pas mai d\u2019una lenga, per obrar a l\u2019unificacion sociala… L’objectiu, de segur, es de la plan chausir, e sembla que sem qu\u00ed sus lo bon chamin.<\/p>\n\n\n\n

Lo l\u00f2bi de la publicitat afirma que, definitivament, una generalizacion de l’occitan lengadocian, seri\u00e1 pas d’eimatjar. Emb quela tend\u00e9ncia de generalizar la prononciacion de totas las letras, qu\u00f2 seri\u00e1 vertadierament pas rentable. Au pretz de la segonda de cerveu disponible, podem nonm\u00e0s comprener e sostener queu sector publicitari, sector que nos fau ben veire coma indispensable e vitau per n\u00f2stra economia.<\/p>\n\n\n\n

Perque sabetz plan que, en lemosin, podem botar un chat dins un sac, mas que podem pas botar un sac dins un chat. Laidonc, deman, amics occitans, diretz tots bureu, tableu, mas tanben chapeu, bateu, manteu o encara chasteu, coteu. Lo monde an plan mestier d\u2019un pauc de coer\u00e9ncia !<\/p>\n\n\n\n

Susana Guimont e la c\u00f2la<\/p>\n\n\n